दाङ : चोरी अभियोगमा पक्राउ परेका एक जना व्यक्ति फरार भएका छन । राप्ती स्वास्थ्य विज्ञान प्रतिष्ठानमा स्वास्थ्य जाँचको लागि लगिएको अवस्थामा शौचालय जाने बहानामा १८ वर्षीय विवेक नेपाली फरार भएको जिल्ला प्रहरी कार्यालय दाङले जनाएको छ । उनी फरार रहेको र खोजी कार्य तीब्र पारिएको जिल्ला प्रहरी कार्यालय दाङका प्रवक्ता एवं डीएसपी जनक मल्लले जानकारी दिए । हिरासतमा राखिएका नेपालीलाई क्षयरोगको शंका गरेपछि खकार परीक्षणका लागि प्रतिष्ठानमा लगिएको थियो ।
बिहान साढे ९ बजेतिर उनी शौचालय जान्छु भनेपछि लगेर गएका प्रहरीले उनको हतकडी खोलिदिएको थियो । हतकडी खोलिएका उनी शौचालयबाटै प्रहरीलाई झुक्याएर भाग्न सफल भएको प्रहरीले जनाएको छ । उनलाई प्रहरीले चोरी अभियोगमा तीन दिनअघि नियन्त्रणमा लिएको थियो ।
©2023 Rapti Pahichan. All rights reserved.
