जग्गाधनी पुर्जा छैन मालपोत कार्यालय तुलसीपुरमा

रमा बुढा मगर -=====

तुलसीपुर, १२ वैशाख २०८० । दाङ तुलसीपुरमा रहेको मालपोत कार्यालय तुलसीपुरमा जग्गाधनी प्रमाण पुर्जा सकिएको छ । गएको फागुन महिनाको अन्तिमतिर पुर्जा सकिएको मालपोत कार्यालय तुलसीपुरका निमित्त प्रमुख खिमराज शर्माले जानकारी दिनुभयो ।  जग्गाधनी प्रमाण पुर्जा सकिएको लामो समयसम्म भूमि व्यवस्था तथा अभिलेख विभागले पुर्जा नपठाएपछि जग्गा किनेर पास गर्नेहरूले जग्गाधनी प्रमाण पुर्जा पाउन सकेका छैनन् । विभागमा पटक पटक जानकारी गराएपनि कुनै सुनुवाई

नभएको निमित्त प्रमुख शर्माले बताउनु भयो ।श्रेस्ता पुर्जा सकिएपछि  कार्यालयले मालपोत कार्यालय सल्यानबाट २ सय ५० , मालपोत कार्यालय लमहीबाट २ सय ५० र मालपोत कार्यालय घोराहीबाट एक सय समेत गरेर ५ सय थान पुर्जा लिएर काम चलाएको कार्यालयले बताएको छ । जग्गा किनेका करिब २ हजार पाँच सय जनाले स्रेस्ता पुर्जा (लाल पुर्जा ) पाउन सकेका छैनन् । कार्यालयमा दैनिक ५० भन्दा बढिले दैनिक जग्गा किनबेच गर्छन् ।२४ लाख रुपैयाँमा ८ कठ्ठा जग्गा किन्नु भएका तुलसीपुर

उपमहानगरपालिका–३ निवासी वीरजंग वलीलाई हिजोआज रातमा निन्द्रा लाग्न छाडेको छ । जग्गा किनेको एक महिनासम्म जग्गाधनी प्रमाण पुर्जा नपाएपछि घरमा परिवारहरूले लालपुर्जा बिनाको जग्गा किनेको भन्दै गाली गर्न थालेको वलीले गुनासो गर्नुभयो । जग्गाधनी पुर्जा लिनका लागि वली एक महिनादेखि मालपोत कार्यालयमा धाउँदै आउनु भएको छ ।यता निमित्त प्रमुख शर्माले पुर्जा सकिएपनि जग्गा किनबेचको काम भने नरोकिएको बताउनु भएको छ ।  बैकमा जग्गा धितो राख्नेलाई सेतो प्रमाण पुर्जा दिएर काम चलाउने गरेको बताउँदै शर्माले एक हप्ताभित्र आउने जानकारी पाएको बताउनुभयो ।