तुलसीपुर,२६ पुस ।
लुम्बिनी प्रदेशमा एमाले संसदीय दलका नेता लिला गिरीले आज (मंगलबार) मुख्यमन्त्रीको दावी पेश गर्ने हुनुभएको छ । लुम्बिनी प्रदेश प्रमुख अमिक शेरचनले दिएको समय भोलि (बुधबार) अपरान्ह ४ बजे सकिने भएपनि गिरीले आजै दावी पेश गर्न लाग्नु भएको हो । लुम्बिनी एमालेको भाग परेसंगै सोही अनुसार दावी पेश गर्न लागिएको सत्तापक्ष गठबन्धन दल राष्ट्रिय प्रजातन्त्र पार्टी संसदीय दलका नेता आशिष कुमार चौधरीले बताउनुभयो ।“आज २ बजे सत्तापक्ष गठबन्धनको बैठक बस्दैछ, बैठक पछि ४ बजे दावी पेश गर्ने कुरा छ”,उहाँले भन्नुभयो ।
प्रदेशमा एकल बहुमत कुनै पनि पार्टीको नभएपछि प्रदेश प्रमुख शेरचनले नेपालको संविधान धारा १६८ को उपधारा (२) बमोजिम बुहमत सदस्यको हस्ताक्षर सहित दावी पेश गर्न आह्वान गर्नुभएको हो । केन्द्रको गठबन्धन अनुसार लुम्बिनीमा पनि एमालेसहित माओवादी केन्द्र,राप्रपा, नागरिक उन्मुक्ती पार्टी, जनमत र जसपाले समर्थन गरेका छन् । त्यस्तै ३ जना स्वतन्त्र सांसद मध्ये रोल्पाबाट १(२)बाट निर्वाचित दिपेन्द्र कुमार पुन केही दिन अघि माओवादी केन्द्रमा प्रवेश गरेका थिए, भने अन्य दुई जना स्वतन्त्र सांसदले पनि सत्तापक्ष गठबन्धनलाई नै सघाउने बताएका छन् । रुकुमपूर्व १(१)बाट निर्वाचित स्वतन्त्र सांसद सुरल पुन र नवलपसारी पश्चिम २(१)बाट निर्वाचित खड्ग बस्नेतले पनि सत्तापक्ष गठबन्धनलाई सघाउने बताएका हुन् ।
प्रदेशमा एमाले सबै भन्दा ठूलो दल हो । जसका २९ सांसद छन्, त्यस्तै सत्तापक्ष माओवादीका १०(दिपेन्द्र पुनसहित),राप्रपा र नागरिक उन्मुक्ती पार्टीका ४/४, जनमत पार्टीका ३ र जसपाका ३ रहेका छन् । गिरीलाई मुख्यमन्त्रीकालागि ५५ सांसदको समर्थन रहेनेछ, भने प्रतिपक्षमा काँग्रेसका २७,लोकतान्त्रिक समाजवादी पार्टीका ३, जनमोर्चा र एकीकृत समाजवादीका १/१ सांसद रहनेछन् । लुम्बिनीमा ८७ सांसद छन् । बहुमतकालागि ४४ सांसद आबश्यक पर्छ ।
मन्त्रालय घटाउने तयारी
लुम्बिनीमा १३ वटा मन्त्रालय छन् । ति मन्त्रालयलाई घटाएर ९ मा ल्याउने गरि छलफल अगाडी बढेको छ । सत्तापक्ष गठबन्धनको सोमबार भालुवाङमा बसेको बैठकले मन्त्रालय घटाउने गरि तयारी गरेको हो । साथै राज्यमन्त्री नराख्ने गरि छलफल भएको राप्रपाका संसदीय दलका नेता चौधरीले बताउनुभयो ।
©2023 Rapti Pahichan. All rights reserved.
