लुम्बिनी प्रदेशका स्वास्थ्य, जनसंख्या तथा परिवार कल्यान मन्त्री इन्द्रजित चौधरीले तुलसीपुर स्थित राप्ती प्रादेशिक अस्पताललाई चारसय सैया बनाउने प्रक्रिया अगाडी बढेको बताउनुभयो ।
अस्पतालको आकस्मिक र बहिरंग सेवा शूल्क निःशुल्क गर्ने कार्यको उद्घाटन गर्दै उहाँले हाल ५० सैयाको दरबन्दी अनुसार मात्रै अस्पताल चलिरहेको भन्दै चारसय बनाउनकालागि गुरुयोजना तयार भइसकेको बताउनुभयो । गुरुयोजनामा भौतिक संरचना निर्माण, दरबन्दी सिर्जना गर्नेलगायतका कार्यकालागि प्रक्रिया अगाडी बढिरहेको बताउनुभयो । साथै अस्पतालमा अहिले जति जनशक्ति छ, त्यसलाई पूर्ण रुपमा प्रयोग गर्न समेत मन्त्री चौधरीले निर्देशन दिनुभयो ।
अस्पतालको प्रसुति भवन समेत हस्तान्तरण भइसकेको भन्दै त्यसलाई थप ब्यबस्थित गर्न २ करोड बजेट बिनियोजन भएको समेत बताउनुभयो । साथै उहाँले अस्पतालमा मुटुरोग, क्यान्सरलगायतका सेवाहरु विस्तारको योजना बनाएको समेत बताउनुभयो । प्रादेशिक अस्पतालको सुधारकाागि अब मन्त्रालयले नै हस्तक्षप गर्नुपर्ने अबस्था आएको समेत बताउनुभयो ।
लुम्बिनी प्रदेश सरकारले आर्थिक वर्ष २०७९/०८० को बजेटमा लुम्बिनी र राप्ती प्रादेशिक अस्पतालमा बिरामीलाई ओपीडी (बहिरंग सेवा) र इमर्जेन्सी (आकस्मिक सेवा) को टिकट तथा बेड (शय्या) मा शूल्क नलिने घोषणा गरेको थियो । सोही अनुसार आईतबारदेखि उक्त सेवा सुरु भएको हो । त्यसकालागि प्रदेश सरकारले बजेटमा एक करोड ५० लाख रुपैयाँ विनियोजन गरेको छ ।
यस अघि अस्पतालबाट इमरजेन्सीको शूल्क रु. ५० र ओपीडीको शूल्क रु.२० लिने गरिएको थियो । यस्तै प्रदेशका सरकारी अस्पतालमा सेवा लिने बिरामीहरुका लागि अब रगत पनि निःशुल्क हुने भएको छ । रगत निशुल्क गर्न राप्ती प्रादेशिक अस्पताल र रक्तसञ्चार सेवा केन्द्रबीच सम्झौता पत्रमा हस्ताक्षर भएको छ । सरकारले रगत निशुल्क गर्नका लागि ३ करोड रुपैयाँ बजेट छुट्याएको छ ।
यसअघि रक्तसञ्चार केन्द्रले एक युनिट रगतको आठ सय रुपैयाँ लिँदै आएको थियो । लुम्बिनी प्रदेशमा वार्षिक ६० हजार युनिट रगत खपत हुने गरेको छ ।
©2023 Rapti Pahichan. All rights reserved.
