नेपाली फुटबल टोलीले बंगलादेशमा एक साता क्वारेन्टिन बस्नुपर्ने।

काठमाडौं । मैत्रीपूर्ण खेल खेल्न नेपाली राष्ट्रिय पुरुष फुटबल टोली बिहिबार बंगलादेशको ढाका प्रस्थान गरेको छ । २५ खेलाडी र बाँकी अफिसियल गरी कूल ३४ सदस्यीय टोली हिमालयन एयरलाइन्समार्फत बिहान ढाका प्रस्थान गरेको हो ।नेपाल र बंगलादेशबीच यही नोभेम्बर १३ र १७ तारिखमा ढाकामा मैत्रीपूर्ण खेल हुँदैछ । त्यसअघि नेपाली टोली करिब एक साता होटेल क्वारेन्टिनमा बस्नुपर्ने भएकोले खेलाडीहरु बिहिबारै त्यसतर्फ प्रस्थान गरेका हु्न । त्यसपछि कोरोना परीक्षण हुनेछ र नेगेटिभ रिपोर्ट आएपछि नेपालले प्रशिक्षण गर्ने अवसर पाउनेछ ।

केही सिनियर खेलाडीलाई कोरोना पोजेटिभ देखिएकाले योपटक नेपाली टिममा नयाँ खेलाडी धेरै संख्यामा समावेश छन् । नेपाली टोलीमा अजित भण्डारी, अनन्त तामाङ, अन्जन विष्ट, एरिक विष्ट, भरत खवास, विकास खवास, विक्रम लामा, बिमल राना, बिशाल श्रेष्ठ, दर्शन गुरुङ, दीप कार्की र दिलेन लोक्ताम, जर्ज प्रिन्स कार्की, किरण चेम्जोङ, नवयुग श्रेष्ठ, पुजन उपरकोटी, रन्जित धिमाल, रवि पासवान, सरोज दाहाल, सेसेहाङ आङदेम्वे, सुभास गुरुङ, सुजल श्रेष्ठ, सुमन अर्याल, तेज तामाङ र छिरिङ गुरुङ पनि टोलीमा छन् ।