प्रदेश ५ को राजधानी दाङ र नाम लुम्बिनी प्रस्ताव पेश गरेको प्रदेशसभा बैठकमा त्यहाँका आन्तरिक मामिला तथा कानूनमन्त्री कुलप्रसाद केसीले विरोधमा उत्रिएका सांसदहरुलाई घिसारेर निकाल्न आदेश दिएका छन्। संसदको रोष्टम प्रयोग गरेर मन्त्री केसीले बोलिरहेको बेला नाराबाजी गरिरहेका प्रतिपक्षी दलका सांसदहरुलाई घिसारेर निकाल्न मर्यादापालकहरुलाई आदेश दिएका हुन्। ‘घिसारेर निकालिहाल्नू’, उनले आफ्नो प्रस्तावबारे बोल्ने क्रममा कांग्रेसका सांसदहरुले टेबुल ठोकेर नाराबाजी गरिरहेका बेला भने। उनले आफ्नो सुरक्षाका लागि बसेका मर्यादापालकलाई त्यस्तो आदेश दिए। छलफलका क्रममा प्रमुख प्रतिपक्षी दल नेपाली कांग्रेसका सांसदहरुले सभाभित्रका कुर्सीसमेत तोडफोड गरेका छन्। सभामुख पूर्णबहादुर घर्तीले मन्त्री केसीलाई प्रस्ताव फिर्ता लिने या नलिने विषयमा बोल्न समय दिएका थिए। ‘म यो प्रस्ता फिर्ता लिन्नँ’ उनले भनेका थिए। प्रतिपक्षीले नाराबाजी गरेपछि मन्त्री केसी अन्तिममा आक्रोशित हुँदै बोलेका थिए।
©2023 Rapti Pahichan. All rights reserved.
